Hórki (SN/MG). Poslednje posedźenje Chróšćanskeje gmejnskeje rady bě wčera spěšnje nimo. Hač na mały přitwark na priwatnej ležownosći w Chrósćicach njemějachu ničo wobzamknyć. W Chrósćicach pak so přiwšěm něšto hiba: Hudźbna šula w Budyšinje je swoje wotnajenske zrěčenje z gmejnu wupowědźiła. To rěka, zo njezměja wot noweho šulskeho lěta hižo wjace filialu hudźbneje šule we wsy. Rozsud šule wjesnjanosta Marko Kliman (CDU) jara wobžaruje. A to nic jenož tysac eurow dla, kotrež změje gmejna wob lěto mjenje na dochodach. Radźićel Uwe Macka „by so wjeselił, hdyž by šula wostała“, wšako ma wona we wsy wěstu tradiciju a mnohe dźěći dadźa so tam wukubłać. Pječa pak je pře mało dźěći, a tak so wobhospodarjenje hižo njewudani. Kliman je skerje měnjenja, zo maja pře mało hudźbnych wučerjow.