Znowa je njedosahaca komunikacija k napjatosćam wjedła
Róžant (JK/SN). Transporter Delanskeho twarskeho dwora je 34 lět stary a wuwiwaše w poslednim času wulku lubosć k zamkarni, hdźež dale a husćišo přebywa, město toho, zo by dźěłał. Gmejna je so tuž rozsudźiła, kupić nowy transporter, za kotryž je trěbnu sumu 35 000 eurow w hospodarskim planje předwidźała. Zo su to krótkodobnje zwoprawdźili, je gmejnskich radźićelow na jich minjenym posedźenju tola překwapiło. Wo tym zhonichu mjenujcy z předłohi na posedźenju, štož runje wulku euforiju njewubudźi.