We wjeskomaj Sprjewiny Doł a Terpje (Terpe) pěstuja dźensa hišće wosebitu tradiciju, kotraž na jeju wusko z brunicowej industriju splećene stawizny dopomina: Dźeń hórnika.
Sprjewiny Doł/Terpje (JoS/SN). We wjesce Sprjewiny Doł bydli hišće 62 ludźi. Kóždy znaje tu kóždeho, nic jenož w domje, ale tež w susodstwje. Wjesna zhromadnosć je wulka. Tež stawizny hórnistwa w regionje k tomu přinošuja. Hosćo na Dnju hórnika w Sprjewinym Dole wčera njejsu jenož něhdyši, ale tež „aktiwni“ hórnicy. Tući přińdu z kónčin kołowokoło něhdyšeje brunicoweje jamy „Brigitta“, tak na přikład z Halštrowskeje Hole, z Grodka abo z Wojerec. Zetkaja so na derje hladanym swjedźenišću, hnydom pódla něhdyšeho sportnišća. Dwaj wuwožowanskej wozyčkaj dopominatej na něhdyše žiwjenje z brunicu w gmejnje.
