We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (10)
Prěnje naspomnjenje Wudworja znajemy z lěta 1301 jako Hovelin. Před štyrjomi lětami je wušła chronika wo Worklečanskej gmejnje, w kotrejž so Beno Wałda a Eckhard Kliemann dokładnje z Wudworjom zaběrataj, kotryž z lěta 1973 mjenowanej gmejnje přisłuša. W poměrnje małej wjesce z lědma wjace hač 150 wobydlerjemi w běhu časow, pak sy někotrežkuli naspomnjenja hódne předewzaće namakał. Jedne z tutych je korčma. Nimale w kóždej wjesce w našej kónčinje sy tajku měł – dźensa podarmo pytaš.
