Helmec swójba w Jitku móže skónčnje swoje plany zrealizować

Jitk (UM/SN). Wobhospodarjer Krabatoweho statoka w Jitku Sven Helm je wjesoły, wšako móže nětko z twarskimi dźěłami za dawno planowany natwar „synoweho hotela“ započinać. „Planowanske zadźěwki za twar hotela smy wotstronili“, wón praji.

W lěće 2022 běše wón z mandźelskej Korneliu prěni raz wo planowanej, jednorej, rustikalnej móžnosći za přenocowanje w bywšim hospodarskim twarjenju statoka rozprawjał. Tehdy je Sven Helm nadźiju zwuraznił, zo tute předewzaće w lěće 2023 dokónči. „Nětko je tola trochu dlěje trało, dokelž dyrbjachmy twarski plan wjace króć změnić, zo bychmy twarsku dowolnosć dóstali“, wón powěda a doda: „Njejsmy móhli runočasnje wjacore ideje zwoprawdźić a zdobom z twarjenjom započinać.“ Nimo toho dyrbjachu Helmecy wočaknyć, zo łastojčki lehnyć přestanu. Hakle po tym su twarske dźěła móžne. A łastojčkow maja na dworje dosć a nadosć. Wone maja tu idealne žiwjenske wuměnjenja a su sebi tohodla Jitkowski burski statok za swój domicil wupytali.