Pančicy-Kukow (SN/MG). Zo je kandidatka CDU za wólby do krajneho sejma, Elaine Jenčec, swój wólbny bój zahajiła, to je nanajpozdźišo potom jasne, wuhladaš-li jeje transporter z wulkim popisom a jeje wobličom. Tutón transporter steješe wčera na dworje klóštra Marijina hwězda w Pančicach-Kukowje. Tola njeje tam jenož Jenčec, ale tež jeje předchadnik Alojs Mikławšk a jako wosebity hósć, statny minister za regionalne wuwiće, Thomas Schmidt (wšitcy CDU). Wón je přijěł, zo by so wo pokročowanju projekta „Pa-Ku – Kommunikations-ARENA“ informował. Za tutym dosć wulkim titulom chowaja so twarske dźěła wosrjedź wsy. Tam su w zašłych tydźenjach a měsacach mjez druhim hrajkanišćo a pawiljonaj nastali.