Lejno (SN). Spočatk julija wopyta zwjazkowa předsydka srjedźostawskeje a hospodarskeje unije (MIT) Gitta Connemann, na přeprošenje kandidatki CDU za wólby do krajneho sejma Elaine Jenčec, łužiski region, zo by sej přehlad wuwića srjedźnostawskich zawodow stworiła. Wjeršk při tym běše wopyt ratarskeho zawoda Ralfa Henčela we wjesnym dźělu Lejno gmejny Pančicy-Kukow. Hižo w třećej generaciji plahuje swójbny zawod mjez druhim ječmjeń, pšeńcu, cokorowu rěpu a koncentruje so wot 2005 zdobom na produkciju symjenja. K swojim woteběrarjam liči Henčel kupcow ze zwjazkoweje republiki, z Europy kaž tež z druhich krajow swěta hač do Chile. Jako bywša předsydka wuběrka za zežiwjenje a ratarstwo w Němskim zwjazkowym sejmje, zajimowaše so Connemann wosebje za plahowanje rostlin a informowaše so při wjedźenju přez zawod wo aktualnym stawje w tutym wobłuku. W rozmołwnym kole rozjimachu zdobom ramikowe wuměnjenja ratarstwa, při kotrychž Henčel wosebje běrokratiju kritizowaše.