Naš wječornik je so mjez młodostnymi naprašował, što w dowolu činja

Łužica je w dowolowym modusu. W statusach na whatsapp abo w storyjach na instagramje su swójbne fota a krasne krajiny widźeć. Julius Paška je so runje po tutym puću mjez Serbami, wosebje młodymi, za tym wobhonił, što je jim wažne, ručež dowol planuja.

Hdźe je najrjeńšo? Wjetšina młodostnych jědźe ze swojimaj staršimaj do dowola, jednotliwcy pak wostanu bjez nich doma. Młodostni chcedźa dopokazać, zo móža so sami zastarować. Mnozy Serbja wočerstwjeja so zwonka Němskeje, chcedźa druhe kraje zeznać abo so tam ze znatymi zetkać. Wjetšinu ćehnje k morju. Tam su turistiske magnety, wšako móžeš so tu derje wočerstwić. Porno tomu maš w horach móžnosć so pohibować. Wjetšina młodostnych je na prašenje, hač so radšo pohibuje abo hač jim napohlad hórskeje krajiny dosaha, wotmołwiła, zo je aktiwna: pućuje, krosnuje abo kolesuje. To je derje za ćěło a dušu.