Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (37)

Pos je znaty jako najlěpši přećel čłowjeka. W běhu swojeje domestikacije wuwiwaše wotwisnje wot družiny mnohe kajkosće, kotrež čłowjek wšědny dźeń wužiwaše. Tež dźensa hišće je pos zasadźeny na pastwach, jako přewodnik slepych, w horach, zo by po lawinach znjezboženych wučušlił, na hońtwach, za stražowanje abo prosće jako swójbny pos.

Zakładne kubłanje a trenowanje psa wotměwa so w prěnich žiwjenskich měsacach. Ćim wažniše je, zo jeho runje w tym času žane chorosće njehaća, kotrež bychu jeho wuwiće w kmanosćach a strowotu negatiwnje wobwliwowali.

W Němskej něhdźe wosom měsacow stare šćenjo prěni króć kombi-šćěpiwo dóstanje. Wuměnjenja su, zo je wone ­klinisce powšitkownje strowe a zo je do toho hižo srědk přećiwo parazitam dóstało.