25 lět dołho organizuje Čornochołmčanski młodźinski klub kóžde lěto wulki lěćny ewent. Tutón kónc tydźenja je zaso tak daloko: na Kubicowej horje woswjeći swoju wulku „Highland-Party“ a přeprošuje wšitkich do reje.

Čorny Chołmc (SR/SN). Hišće je puć na Kubicowu horu, bjezposrědnje w susodstwje wjeski, dyrdomdej. Wjetše a mjeńše dźěry je tu woda po zliwkach z hory dele běžo „zawostajiła“. Tola dźensa, pjatk, hdyž změje „Highland – Party“ swój zazběh, je wopytowar hižo widźeć njebudźe. Wo to postaraja so čłonojo młodźinskeho kluba w Čornym Chołmcu, kotryž je zarjadowar lěćneho ewenta. Po třoch lětach z mjeńšimi zarjadowanjemi pod titulom „Black Mountain Partys“ so klub lětsa zaso k swojim spočatkam nawróći. Jedna přičina za změnu je nowa generacija w čłonstwje. „Wšitcy smy w běhu lět tójšto zhromadnje dožiwili, wjele nazhonjenjow nahromadźili a při tym do praweho cyłka zrostli“, powěda 22lětny čłon předsydstwa kluba Max Buder.