Wěra a serbska rěč stej stołpaj, na kotrymajž ma so dźěłać

Čorny Chołmc (AK/SN). W bróžni Krabatoweho młyna knježeše njedźelu popołdnju wjesoła zhromadnosć. 18. Serbski ewangelski domizniski dźeń běše ­jasne wuznaće k wěrje a serbskej rěči. Joachim Nagel, iniciator domizniskeho dnja w lěće 2007, bě wosebje hłuboko hnuty, jako ludźo serbsce spěwachu. 77lětny něhdyši farar ewangelskeje ­Janskeje wosady Wojerecy-Stare město rjekny, zo je w młynje rady z hosćom. „Tajki młyn je dynamiski. To je wažne tež za nas. Wšako w serbskim přisłowje rěka: ‚Njeklepotaj jenož, pokazaj mi tež ­muku.‘“ Hodźiny so spěšnje minychu. Dźěći z pěstowarnje „Krabat“ w Čornym Chołmcu, kotraž je w nošerstwje Dźě­łaćerskeho dobroćelstwa Wojerecy, su z kulturnym programom překwapili. Tež holcy tamnišeje nałožkoweje skupiny pod nawodom Sunhild a Petera Schreibera přijachu sylny přiklesk. Wone zawjeselichu wopytowarjow ze znatymi rejemi kaž „Stup dale“ a „Slepjanska polka“. Zdobom pak předstajichu tež tři nowe reje.