650. róčnicu załoženja wjesnjenjo a hosćo porjadnje woswjećili

Smjerdźaca (SN/MG). Pisany hołk a tołk, reje, hudźba, wjeselo. Swój 650ty jubilej su Smjerdźečanki a Smjerdźečenjo wulce woswjećili. Cyły kónc tydźenja, jako hladachu druhdźe ze strachom na bližace so wólby, knježeše w małej wjesce mjez Róžantom, Łazkom a Šunowom radosć nad róčnicu załoženja wsy.

Swoje statoki běchu wjesnjenjo z wšelakorymi historiskimi wobrazami wupyšili. Tak nazhonichu wopytowarjo mnoho zajimaweho wo burskich tradicijach, žiwjenju na wsy, ale tež wo tym, što bě Konsum za čas NDR we wsy předawał. Runja wobrazam na ležownosćach wjesnjanow běše tež wustajeńca w kulturnym domje dohlad do bohatych stawiznow sydlišća. Znate wosoby, kaž spisowaćela Mikławša-Bjedricha Radlubina, kotryž je so we wsy narodźił, tam na přikład předstajichu.