Hory (AK/SN). Gmejna Halštrowska Hola chce při Lejnjanskim jězoru bórze turistiski serwisowy areal z torhošćom, wobchodami, gastronomiju a z dowolowymi bydlenjemi natwarić. To su gmejnscy radźićeljo na swojim posedźenju wutoru na Horach wobzamknyli. Nastać ma šěsć domow wokoło centralneho torhošća. Cyłkowny areal twarskeho projekta ma 2 500 kwadratnych metrow přestrjenje. „Dohromady 68 bydlenjow chcemy w hornich poschodach domow zaměstnić“, rozłoži Heidrun Eger, sobudźěłaćerka twarskeho zarjada gmejny. „W delnich poschodach chcemy wobchody, gastronomiske poskitki kaž tež wobchody ze sektora posłužbow zaměstnić“, wona doda.