Budyšin (CRM/SN). Wjace hač pjećdźesat ludźi je Budyska županka Leńka Thomasowa sobotu popołdnju witała, kotřiž ­běchu přeprošenju župy na serbske wodźenje po Budyskim Tuchorju z Trudlu Malinkowej a Jurjom Łušćanskim sćěhowali. Je to najwjetše pohrjebnišćo ­města a zdobom regiona. Areal, kiž bu w běhu swojich 500lětnych stawiznow wjacekróć rozšěrjeny, wotbłyšćuje tež serbske kulturne stawizny.

Prěnja stacija z dohromady pjatnaće běše row dr. jur. Bjedricha Adolfa Klina. B. A. Klin přisłušeše kruhej wulkich narodowcow rozswětlerskeje doby. Narodźeny 1792 w Barće, sta so wón w Budyšinje z prawiznikom a zastupowaše w měšćanskej radźe kaž tež w Drježdźanskim sakskim sejmje prawa Serbow.