Składnostnje 50lětneho wobstaća ­Budyskeho spjateho jězora je krajne zarjadnistwo za rěčne zawěry njedźelu wšitkich zajimcow na dźeń wotewrjenych duri přeprosyło.

Budyšin (CS/SN). To sej Budyšenjo a wobydlerjo kołowokoło Budyskeho spjateho jězora dwójce kazać dali njejsu. Při najrjeńšim wjedrje přichwata něhdźe 7 000 wopytowarjow do Delnjeje Hórki, něhdźe połojca z nich běše so na „koleso šwiknyła“. Dohromady 50 sobudźěłaćerjow krajneho zarjadnistwa za rěčne zawěry so wo to postara, zo su wšitcy z nich njezapomnity dźeń dožiwili. Woni su jim městnosće wotewrili, ke kotrymž wopytowar poprawom přistup nima. Tak na přikład na wulki nasyp, kotryž hač do Chwaćic wjedźe a kotryž móžeše sej kóždy pěši abo na kolesu wotkryć. Wuhlady wottud, na hobersku płoninu wodźizny jězora, w pozadku krasnu siluetu města kaž tež módre łužiske hory běchu jónkrótne.