Wojerecy (KD/SN). „Runje hladajo na serbšćinu wuknjacych je BOOKii-technologija ze swojej akustiskej dimensiju jara spomóžna“, praji Marija Šołćic, rěčna motiwatorka projekta ZARI, syće za serbsku rěč a regionalnu identitu. Hłowny element technologije je elektroniski pisak, kotryž je kmany zwuki w mp3-formaće nahrawać a wothrawać. Signal za wothrawanje dóstanje přez kode na nalěpku. „Z pomocu tuteje technologije móžetaj dźěd a wowka swojim wnučkam akustiske powěsće w serbskej rěči zawostajić, na přikład jako komentar k scenje abo wosobje, kotraž je na foće zwobraznjena. Tak wostanu rěč, kultura a stawizny žiwe“ wudospołni rěčna motiwatorka.