Łužiske ludowe wašnje twarjenja po puću k swětowemu kulturnemu herbstwu“ bě hesło ekskursije Serbskeho muzeja a jeho spěchowanskeho towarstwa zašłu sobotu.

Budyšin (AP/SN). Pod fachowym nawodom Arndta Matthesa, jednaćela załožby „Stiftung Umgebindehaus“, bě sej 35 zajimcow z Radworskim Šmitec-Šwarcec wozydłownistwom do hornjeho kraja wulećało. Dokelž bě wuprawa dźěl přewodneho programa wustajeńcy dr. Betiny Kaunoweje wo twarskim inženjeru Eberhardźe Dučmanu, bě prěnja stacija „Stara róla“ w Habrachćicach, mjez lětomaj 1991 a 1996 saněrowana chěža ze stołom. Prof. Dučman wuwi na přikładźe tutoho twara zhromadnje z „Němskim centrumom za rjemjesło a hladanje pomnikow“ w Fuldźe modelowy projekt za restawrowanje chěžow ze stołom.