Na Dnju němskeje jednoty před dźesać lětami swjećeštej Helmec mandźelskaj Kornelia a Sven w Jitku swój kwas. Tehdy rozsudźištaj, zo chcetaj tradicionalny swjedźeń na tamnišim burskim dworje nic w meji abo nazymu, ale stajnje na swojim kwasnym dnju přewjesć.
Jitk (aha/SN). Mjeztym hižo dźewjaty raz staj so mandźelskaj wo dobry wotběh swjedźenja zamołwiće starałoj. Lětsa bě tomu třeći raz, zo přewjedźe so zdobom tež Krabatowy swjedźeń – wunošna to symbioza – na Helmec burskim a jěchanskim dworje. Krajny rada Budyskeho wokrjesa Udo Witschas (CDU), kmótr projekta, hódnoćeše z jadriwymi słowami angažowanosć Krabatoweho towarstwa hladajo na zachowanje a skrućenje našeje regionalneje identity.
Wo wulkim zajimje swědčeše nimale 300 awtow na parkowanišću, tež ze zdalenišich kónčin. Wjele prašenjow mějachu mnozy mjez něhdźe tysac wopytowarjemi tež na Krabata alias Wolfganga Krausa. W swjedźenskim stanje su Chróšćanscy muzikanća publikumej zahudźili. Tež šěsć porow rejowarjow Serbskeho folklorneho ansambla Wudwor postara so wo serbski flair na swjedźenju.
