Młodźinske towarstwo Pawk swjeći swoje 30lětne wobstaće

Budyšin (SN/VaŽ). Młodźinske towarstwo Pawk zhladuje lětsa na swoje 30lětne wobstaće. W lěće 1994 załožeše so mjenujcy Serbske młodźinske towarstwo „Pawk“ z. t. w Budyšinje. Kóžde lěto přewjedźe a organizuje towarstwo tójšto projektow kaž na přikład PowerSerb, nócny wolejbul a wuměnu na festiwalu Roskilde. Studenća podpěruja šulerjow zdobom w zhromadnym dźěle ze Serbskim gymnazijom kaž tež hladajo na hudźbne abo kulturne projektowe ideje w Serbach. Hižo tehdy běše zaměr Pawka: serbsku młodźinu zjednoćić, wo nowosćach a zhromadnych akcijach informować a z tym serbsku młodźinsku syć natwarić. To je podobnje dźensnišemu zaměrej: „Chcemy styki z młodźinskimi klubami w Hornjej Łužicy zachować a jich podpěrać, jelizo pomoc trjebaja. Tohorunja je nam skrućenje stykow do Delnjeje Łužicy jara wažne. Dale chcemy tež na Europskej runinje aktiwni wostać a z tamnymi mjeńšinami kontakt nawjazać. Widźimy ideje populistow, kiž demokratiju wohroža, štož je za nas motiwacija jednać,“ zwurazni předsyda towarstwa Lukaš Pječak.