Na tak mjenowanym parkowym seminarje, kotryž je so minjeny kónc tydźenja na łuce při hrodźe w Delnim Wujězdźe wotměł, so Delnjowujězdźenjo wo ­hladanje a ponowjenje hrodoweho ­parka starachu.

Delni Wujězd (JR/SN). Hižo 14 lět je zarjadowanje kruty termin w gmejnskej protyčce. Dohromady 30 angažowanych ­wobydlerjow Delnjeho Wujězda běše na tutón seminar wosebiteho razu přichwatało, kotryž organizuje mjez druhim ­wjesne domizniske towarstwo. Podpěru dóstawa wot architektki za krajinu Katrin Franc z Lipska. Wona pak njebě towarstwu jenož z fachowej poradu poboku, ale so sama tež mócnje gratu přimaše.