Bukecy (SN). W Bukecach běštej Serbske ewangelske towarstwo a tamniša Bjesada sobotu popołdnju na Serbski dźeń přeprosyłoj. Zestajiłoj stej wobšěrny program za wopytowarjow kóždeje generacije.

Dźeń zahaji so na Bukečan ewangelskej šuli z krótkej nutrnosću, kotruž nawjedowaše Serbski superintendent Christoph Rummel. Po tym sćěhowaše dźěłarnička Bjesadow. Je to lětny termin wuměny nazhonjenjow mjez wšemi Bjesadami we Łužicy. Na sobotniše zarjadowanje běchu zastupjerjo z Blunja, Wojerec, Hodźija a z Rakec přichwatali. Mato Krygaŕ, předsyda Serbskeho ewangelskeho towarstwa a zdobom organizator Bukečan bjesady, pak by sej tróšku wjace wopytowarjow tamnych „Bjesadnikow“ přał, kaž praji na naprašowanje našeho wječornika. Wón ma mjenujcy skutkowanje tutoho kruha w ewangelskich łužiskich kónčinach za jara spomóžne, „wšako pokazuja wosadam, zo tu jako Serbja dale aktiwni smy“.