Hač do lěta 2026 Wojerowske dwórnišćo wobšěrnje přetwarja
Wojerecy (AK/SN). Spočatk nowembra zahaja na dwě lěće wobšěrne ponowjenske dźěła na Wojerowskim dwórnišću. Je to zhromadny projekt Němskeje železnicy ze Swobodnym statom Sakskej, z Wobchadnym zwjazkom Hornje Łobjo (VVO) a dalšimi partnerami.
Wčera su zastupjerjo wšitkich na projekće wobdźělenych stron kaž tež města Wojerecy twarske dźěła oficialnje zahajili. Za zwoprawdźenje projekta su woni Budyske předewzaće Hentschke Bau społnomócnili. Cyłkowne kóšty wučinjeja 21 milionow eurow. Wot tuteje sumy přewza Němska železnica 7,4 miliony, kraj Sakska 7,7 milionow a VVO 5,9 milionow eurow.
