Přirodoškitna stacija dźěło w ponowjenym kubłanskim centrumje zahajiła

Mały Holešow (UM/SN). Kubłanske srjedźišćo za wobswět na rybarskim dworje w Małym Holešowje blisko Njeswačidła su njedawno po połdralětnym přetwarje poswjećili. Je to jedyn z prěnich projektow we wokrjesu Budyšin, kotryž je so z pomocu srědkow za změnu strukturow zrealizował.

Zazběh twarskich dźěłow běše loni, 16. měrca – „po dwěmaj lětomaj intensiwneho planowanskeho dźěła“, praji tehdy Angelika Schröter, jednaćelka ­Njeswačanskeje přirodoškitneje stacije, kotraž je nošer rybarskeho dwora. Ideja za projekt wšak je hišće starša. Tola hakle móžnosće spěchowanja w zwisku z kóncom wudobywanja brunicy we Łužicy běchu jón nastorčili. Spěchowanska suma wučinja něhdźe 2,5 milionow eurow. To je 90 procentow cyłkownych kóštow.