Z wustupom Serbskeho muskeho chóra Delany w Pančicach-Kukowje je so wutoru lětuši rjad nazymskich koncertow zakónčił. Delanscy mužojo žnějachu za swój dobru hodźinu trajacy program wjele chwalby a sej tež z publikumom zhromadnje zaspěwachu.

Pančicy-Kukow (SN/MWj). 22 lět je trało, zo je sej Domowinska skupina Pančicy-Kukow zaso raz Serbski muski chór Delany na nazymski koncert přeprosyła. Z nimale 90 wopytowarjemi bě awla Šule Ćišinskeho połnje wobsadźena, jako mužojo tam spěwajo zaćehnjechu. To wšak běchu hišće w swojich kabatach. Pod nimi pak mějachu překwapjenku přihotowanu, kotruž pozdźišo hordźe prezentowachu. W Pančicach mjenujcy wustupichu prěni raz z nowym outfitom, a to z běłymi folklornymi košlemi a z lacom, na kotrymž mějachu stilizowany chmjel a ječmjeń našity. Z podpěru Załožby za serbski lud běchu sej nowu drastu w Čěskej zešić dali. Debjenku na lacach naćisnyła bě Marija Šołćic, za čož so jej na kóncu programa nawoda chóra Janek Wowčer z kwětku dźakowaše.