Hamor (AK/SN). Hamorska gmejna zhladuje na wuspěšnu sezonu 2024 při Bjerwałdskim jězoru. Tole wuzběhny wjesnjanosta Hendryk Balko (Hamorske wolerske zjednoćenstwo) na zašłym posedźenju gmejnskeje rady. Wón dźakowaše so towarstwam a njeličomnym pomocnikam za zarjadowanja, kotrež su lětsa přewjedli, mjez druhim za njedawnu 27. mjezynarodnu Łužisku rallye ADMV.

31. oktobra je so wodosportowa sezona při Bjerwałdskim jězoru skónčiła. Nětko spočina so za nuzniki, přistawy, parkowanišća a wobswětlenje takrjec zymski čas. Specialna firma stara so wo wšitke płuwace připrawy w přistawach. To žada sej dźeń a wjace wudawkow, dokelž wichory stajnje sylnišo zachadźeja a škody naparaja. W zhromadnym projekće z Łužiskim a srjedźoněmskim hórnistwowym zarjadnistwom (LMBV) chce gmejna tute připrawy přetwarić a je wužadanjam změny klimy přiměrić.