Wokrjesny sejmik póndźelu wo zwyšenju płaćiznow za dźiwadło rozsudźi

Budyšin (SN/mb). Wšo dohromady 38 dypkow dnjoweho porjada změje Budyski wokrjesny sejmik přichodnu póndźelu na starosći. Naćisk za wobzamknjenje nastupajo „nowe płaćizny zastupnych lisćikow za Němsko-serbske ludowe dźiwadło Budyšin (NSLDź) postajić“ móhł zjawnosć najbóle zajimować. W rubrice „financielne wuskutki“ steji „wjac dochodow dźiwadła přez zastup we wysokosći 130 000 eurow na lěto“. Wuskutki na móšeń wopytowarjow: Jednotliwy tiket budźe wot klětušeho 1. januara mjez 1 a 5 eurami dróši. W abonemenće płaći zwyšenje wot spočatka noweje hrajneje doby 25. awgusta 2025. Płaćizny w dźiwadle za dźěći a młodostnych, za klankodźiwadło a lajske dźiwadło stupaja jenož wo 1 do 2 eurow. A štóž ma prawo na potuńšeny zastupny lisćik, ma jenož jedne euro wjac płaćić. Zastup do lěćneho dźiwadła chcedźa přerěznje wo tři eura zwyšić.