Wojerecy (AK/SN). W lěće 2020 wotewrjena nowa Wojerowska wyša šula dóstanje přitwar. To je wjetšina měšćanskeje rady wčera rozsudźiła. Po tuchwilnym trochowanju budźe projekt 3,5 milionow eurow płaćić. Swójski podźěl města wučinja 1,7 milionow eurow, tamny dźěl zapłaća ze spěchowanskimi srědkami Swobodneho stata Sakskeje. Z nowotwarom reaguje město jako nošer šule na přiběrace ličby šulerjow, na wčerawšim posedźenju měšćanskeje rady rěkaše. Wyšu šulu wopytuje tuchwilu 454 šulerjow.
Nowy dźěl šule ma z jednotliwych modulow nastać, a to direktnje napřećo awli kubłanišća. Hišće lětsa chcedźa twarnišćo spřihotować a prěnje twarske dźěła wupisać. Spočatk přichodneho lěta je rozdźěla. Prěnje module dochadźeja wot julija 2025. Dobre lěto pozdźišo budźe nowy dźěl šule nadźijomnje hotowy.
