Budyšin (CS/SN). Staroměšćanske towarstwo Budyšin je předwčerawšim přednošk wo Małowjelkowskej sotrowni ­wuhotowało. Na žurli měšćanskeje biblioteki předstaji Ulrike Riecke stawizny apoteki, kotraž bu pod dohladom lěkarja wot ­sotrow wobhospodarjena. Lěkarnja bě Budyskim apotekarjam ćerń we wóčku. W 19. lětstotku konkurowaštej w sprjewinym měsće apotekarjej, kotrajž pak wobaj Małowjelkowsku apoteku wotpokazaštaj. Hinak hač sotry běštaj wonaj wjacelětny studij absolwowałoj. Wot lěta 1825 běštaj tohodla wjacekróć přećiwo nim skoržiłoj, tola Małowjelkowčanki dopokazachu stajnje, zo „pola nich wšo po dobrym běži. Radosć nad procesami pak ma za nas porodźenych něšto dobre: Eksistuje mjenujcy tójšto aktow, kotrež wo dźěławosći apoteki sotrownje swědča, kotraž bu na zakładźe spěchowanja załožby Henrietty Sophie hrabinki von Hohenthal załožena.“ In­stitucija zmóžni „tež njezamóžnym zasta­ranje z trěbnymi medikamentami“. ­Apoteku ­natwarichu w lěće 1800 w běhu dwanaće měsacow. Mjenowanaj Bu­dyšanaj skoržeštaj 1830 a 1831 přećiwo Małowjelkowskej lěkarni.