Budyšin (CS/SN). 40 lět je dr. René Lešawa jako urologa dźěłał. Nětko je so 67lětny na zasłuženy wuměnk podał. Za jeho njewšědny žiwjenski wukon jemu kolegojo Hornjołužiskich klinikow (OLK) srjedu njezapomnite rozžohnowanje wobradźichu.

Jednaćel OLK Jörg Scharfenberg rjekny, zo so z dr. Renéjom Lešawu wosebita doba skónči. Po jeho słowach je urologa „medicinska legenda“. Wuznamjeniło je jeho humanistiske nastajenje k žiwjenju. Pacientam dawaše wón nadźiju a bě jim swětło w ćmowych hodźinach. „Budźemy was njeskónčnje parować“, praji Scharfenberg. Tež lěkarski direktor dr. Frank Weder fachowu ekspertisu swojeho kolegi chwaleše a wuzběhny, zo je dr. Lešawa mnohich dorostowych lěkarjow wukubłał. Krajny rada Udo Wićaz, kiž jako předsyda dohladowanskeje rady OLK porěča, je wuličił, zo je dr. Lešawa za čas swojeho 40lětneho powołanskeho skutkowanja něhdźe 40 000 pacientow stacionarnje zastarał.