Wotpokazanje natwara wětrnikow we Łazu prawnisce problematiske
Łaz (AK/SN). Łazowska gmejnska rada zhladuje na zdobywanje energije z wětra dale kritisce. Wona je so přećiwo zasadnemu wobzamknjenju postajenja dohromady pjeć wětrnikow wuprajiła. Na swojim posedźenju wutoru wječor je 14 zapósłancow za zběhnjene wobzamknjenja hłosowało. Wjesnjanosta Thomas Leberecht (CDU) a radźićel Hagen Aust (CDU) hłosowaštaj přećiwo zběhnjenju. Po nowemberskim posedźenju je Łazowska gmejnska rada z tym zasadne wobzamknjenje wospjet cofnyła. Wobmyslenja a dwěle wobydlerjow su přewulke, napohlad jara wysokich připrawow wosrjedź lěsa njeje hladajo na wuwiwanje turizma w gmejnje spomóžne – tak přećiwnicy argumentowachu. Mnoho ludźi ma tež wobmyslenja wuskutkow na strowotu a kaž tež na domjacu ptačinu dla.
