Mały Kólsk (JoS/SN). Nancy Sauer, direktorka Europskeho zwjazka za teritorialnu kooperaciju (EVTZ) w Geoparku Mužakowski zahork, njebě swojim hosćom přewjele slubiła, jako praji: „To budźe dźensa wječor cyle wosebiteho razu.“ A woprawdźe – na kóncu zarjadowanja, kotrež běše EVTZ zhromadnje ze Załožbu za serbski lud, Serbskim kulturnym centrumom (SKC) w Slepom a Serbsko-němskej filmowej syću Łužycafilm organizowali, běchu wopytowarjo zahorjeni. Tema wječora w Starej Cyhelnicy w Małym Kólsku (Klein Kölzig) běše serbske dźěćatko/dźěćetko.

Wječor zahajištej w Slepjanskej narodnej drasće Marita Kavelmann a Doreen Rösler z hodownymi pěsnjemi a kěrlušemi, kotrež w Slepjanskej narěči kaž tež němsce zanjeseštej. W tamnišej wosadźe stej wonej derje znatej spěwarce. Regionalna rěčnica Domowiny Diana Maticowa běše zestawu fotow Michaela Zecha wo narodnych drastach z fotoweje wustajeńcy w SKC sobu přinjesła. Wjeršk wječora wšak běchu potom serbske filmy, do kotrychž zawjedźe projektowa koordinatorka filmoweje syće Angela Šusterowa.