Wojerecy (SN/MWj). Druhi dźeń hód započnu we Wojerowskej Łužiskej kupjeli na probu dźěłać. Kaž Christin Steinborn z marketingoweho wotrjada zdźěli, su laborowe přepytowanja wody w dožiwjenskim a dźěćacym wobłuku bjezporočne, tak zo hodźitej so wonej zjawnje wužiwać.

Awtomaty za zastupne lisćiki kaž tež nowy kasowy system su minjene dny doskónčnje testowali. Tež gastronomiski wobłuk su za wopytowarjow přihotowali. Nimo toho instalowachu wodźenski system a pobrachowace napisy. Kaž Christin Steinborn dale zdźěli, měli wopytowarjo wobkedźbować, zo kupjel najprjedy raz na probu dźěła a zo móhło tu abo tam hišće k njedostatkam dóńć, štož njehodźi so po tak dołhim času zawrjenja wuzamknyć. Tohodla wopytowarjow hižo nětko wo zrozumjenje proša.