Kulow (AK/SN). W lěće 2025 liči Kulowski zawod za wopłóčki z pozitiwnym wuslědkom něhdźe 54 000 eurow. Tole zdźěli komornik města Mathias Kockert na zašłym posedźenju měšćanskeje rady. ­Jeje čłonojo hospodarski plan zawoda jednohłósnje schwalichu. Předwidźane je mjenje wudawkow hač dochodow. Nimo toho chcedźa 114 000 eurow swojich kreditow wotpłaćić. Po wjele lětach komunalneje podpěry wuńdźe měšćanski zawod nětko bjez přiražkow. Hišće w lěće 2021 přida město 82 000 eurow, lěto na to bě to 22 000 eurow a w lěće 2023 na wšěch 75 000 eurow.

„Lěpšeho hospodarskeho połoženja dla móžemy někotre inwesticije zwoprawdźić“, Mathias Kockert rozłoži. Po tym zo su loni někotre klumpy ponowili, su nětko dodźeržane jězdźidła na rjedźe, kotrež dyrbja wuměnić. Dohromady je lětsa 80 000 eurow za inwesticije předwidźane. Mjez druhim dyrbja nowy kolesowy nakładowak wobstarać. Dźěl sumy nałožuja za porjedźenje kanaloweho systema.