Wulkodubrawske předewzaće nowemu mějićelej přepodate
Wulka Dubrawa (BB/SN). Na tutu mjeztym hižo tróšku zatołkanu cedlu je Křesćan Schneider tež po 35 lětach hišće hordy. Wona je jeho žiwjenje dospołnje změniła. Wulki kulowaty kołk z napismom „Němska demokratiska republika“ jemu hamtsce wobkrući, zo smědźeše tehdy 31lětny wot 1. januara 1990 skónčnje samostatne rjemjesło załožić. Potajkim chłódźaki zwuporjedźeć, elektriku instalować a bórze po tym tež we Wulkej Dubrawje swójski wobchod wotewrić. „Schneiderec kuchnje“ mějachu spěšnje tež zwonka Wulkodubrawskeje wokoliny dobre mjeno.
Loni kónc nowembra swjećeše Křesćan Schneider 65.narodniny. Dobry to čas, wšo do młódšich rukow přepodać. Tuž rěka jeho moderny wobchod wosrjedź Wulkeje Dubrawy wot 1. januara 2025 „Schneiderec kuchnje, mějićel Michał Kubica“. Nowy šef wšak je Schneiderec dotalnym kupcam stary znaty. Wón bydli w Chrósćicach a dźěła hižo třinate lěto we Wulkej Dubrawje. „Sym ze swojimi 41 lětami najmłódši w našim teamje“, so Michał Kubica směje.
