Budyšin (CRM/SN). Přeprošenje na tradicionalnu wosadnu hodowničku na Benowej žurli Montessorijoweje šule na Tzschirnerowej a do toho na ekumeniski nyšpor w cyrkwi Našeje lubeje Knjenje na prěnjej njedźeli w nowym lěće běchu tež tónraz Serbowki a Serbja wšěch generacijow radlubje sćěhowali. A hižo na ekumeniski nyšpor, w kotrymž přewza superintendent Krystof Rummel prědowanje, bě mnoho ewangelskich wěriwych přišło.

Na žurli Montessorijoweje šule mjerwješe so potom k wjeselu wšěch z wjele dźěćimi. To njebě w zašłosći přeco tak było. Agilne młode swójby wuhotuja tuž po swojich předstawach a móžnosćach kulturny program. Tónraz běštej so tomu předewšěm Weronika Budenteichowa a Božena Šimanec wěnowałoj.