Dnowneje platy dla molerjo z dźěłom pokročować njemóža

Dźěwin (AK/SN). Dotwar noweje wohnjowoborneje gratownje w Brězowce w Dźěwinskej gmejnje so wo něšto tydźenjow dlije. Prěni předwidźany termin kónc lěta 2024 njejsu dodźeržeć móhli. Tole zdźěli twarski nawoda Slepjanskeho zarjadniskeho zjednoćenstwa Steffen Seidlich na zašłym posedźenju Dźěwinskeje gmejnskeje rady.

„Někotre dźěła njejsu hišće zakónčene“, Seidlich rjekny a naliči nutřkowne wuhotowanje, kładźenje kachlicow, elektriku a molerske dźěła. Problemy maja z lěwej dnownej platu z betona. Wona jenož pomału schnyje a je hišće přewłóžna. Tohodla molerjo w tym dźělu twarjenja hišće dźěłać njemóža. Zhromadnje z planowanskim běrowom a gmejnu chce twarski nawoda rozrisanje namakać. Tež wonkowny areal hišće dočinjeny njeje. Kromy, terasa a přechod k Dwórnišćowej dróze drje su hotowe, někotre městna pak maja so hišće wuplestrować. „Nadźijamy so, zo najwjace dźěłow hač do kónca januara wotzamknjemy. Wosebje problem włóžneje dnowneje platy dyrbimy rozrisać“, tak Seidlich.