Rowno (JoS/SN). Wjele dźěła čakaše minjeny tydźeń na pilnych pomocnikow w Rownom. Na Njepilic statoku přeprošowachu na wulke swinjorězanje. Bě to mjeztym hižo 24. tajki swjedźeń po za­łoženju tamnišeho spěchowanskeho towarstwa. Po tym zo běchu něšto dnjow do toho hišće camprowali, so akterojo hižo dźensa před tydźenjom prěni raz zetkachu, zo bychu wšo trěbne přihotowali. Kóždy jednotliwc wědźeše, kotre nadawki ma. Na dworje bě wšědnje něhdźe 20 pomocnikow zasadźenych. To njeběchu jenož čłonojo towarstwa, ale mnozy dalši zwólniwi ze wsy.