Radwor (UM/SN). Stawniske wěrowanja w Radworju hižo wjele lět nimaja. „Wobsteješe raz móžnosć, so na žurli gmejnskeho zarjadnistwa wěrować dać“, wě wjesnjanostka Madeleine Rjenčowa. A tež w torožu blisko hrodu su so pory hižo wěrować dali, ale to bě před wjele lětdźesatkami. „Naš wotpohlad wot wšeho spočatka bě, torožo zjawnosći přistupnić, a to nic jenož jónu wob lěto k dnjej wotewrjeneho pomnika“, praji wobsedźerka Annette Lehder.

To hodźeše so derje k přeću gmejn­skeho zarjadnistwa, nimo Minakałskeho hrodu dalše městno za stawniske wěrowanja w Radworju samym wutworić. A tak su mału wjelbowanu žurlu, kotraž je hnydom pódla wjelbowaneho pře­jězda, spočatk lěta 2025 jako městnosć wěrowanjow wěnowali. Wobzamknjenje Ra­dworskeje gmejnskeje rady za to trěbne njebě, za to pak Malešanskeje. „Při­čina je, zo přisłuša Radworska gmejna Malešanskemu stawniskemu wobwodej a Malešanska gmejna tónle nadawk za nas runje tak sobu wukonja kaž za Wulkodubrawsku gmejnu“, Madeleine Rjenčowa rozłoži.