Rakecy (JK/SN). W poměrnje krótkim času su so wjacore předewzaća w Rakečanskej gmejnje předstajili, zo bychu tu za swoje druhdy jara daloko sahace plany wabili. Nimo firmow na polu wobnowjomnych energijow je to tež inwestor na polu wikowanja. Hižo loni su w gmejnskej radźe prěni raz wo tym wuradźowali, kajke wuskutki by nowe nakupowanišćo w gmejnje na dotalne struktury měło.
Na minjenym posedźenju gmejnskeje rady buchu mysle wo tym nětko konkretniše. Kaž wjesnjanosta Swen Nowotny (CDU) potwjerdźi, je móžny inwestor noweho nakupowanišća ležownosć něhdyšeje kormjernje južnje Rakec kupił, zo by swoje předewzaće zwoprawdźił. Nětko ma gmejna wobtwarjenski plan nastajić. Zakład za to je tak mjenowane nastajenske wobzamknjenje. Tute je gmejnska rada z wjetšinu radźićelow wobzamknyła.
