Wažna tema na wčerawšim posedźenju Wojerowskeje měšćanskeje rady běše staw prezency serbskeje rěče a kultury w měsće. W tutym zwisku su tež nadawki za přichod rozjimali.

Wojerecy (AK/SN) „Serbska rěč, kultura a tradicije su we Wojerecach prezentne. Wone su přirodne bohatstwo regiona, kotrež smy spóznali a spěchujemy“, tole podšmórny Wojerowski wyši měšćanosta Torsten Ruban-Zeh (SPD) wutoru na posedźenju rady. W swojej rozprawje wo situaciji a realizaciji wustawkow spěchowanja serbskeje rěče a kultury w měsće mjenowaše wón rěčnu korekturu dwurěčnych dróhowych taflow a pokročowanje wučby serbšćiny za šulerjow pjateho lětnika jako wažnej nadawkaj w tutym lěće.