Choćebuz (NC/KP). Serbske blido, kiž je so wčera 104. raz w Choćebuskim Serbskim muzeju schadźowało, tónraz wo­sebje wjele zajimcow přiwabi. Něhdźe 30 wopytowarjow bě wćipnych zhonić, kak ma z w lěće 2013 zahajenym rewitaliza­ciskim projekće za delnjoserbsku rěč „jo!zatebje“ dale hić. Wo tym informowachu sobudźěłaćerjo wotrjada za regionalne wuwiće a škit mjeńšinow Serbskeho instituta (SI) w Choćebuzu Měto Nowak, Sophie Rädelowa, Julija Běrinkowa a dr. Anastasija Kostiučenko. Wo dotalnym wuwiću a stawje projekta njeporěča jenož Nowak sam, ale tež tehdyši sobu­wojowarjo, z kotrychž mnozy w publikumje sedźachu. Prěnjotny projekt běchu koronapandemije dla zastajili. Hižo 2023 pak je SI w prěnjej fazy wědomostnu analyzu wuměnjenjow zahajił, zo by ­projekt pod nowym mjenom SROKA – akronym steji za Serbsku rewitalizaciju organizować, koordinować a analyzować – dale wjedł. Oficialny zazběh je w juliju planowany. Rozmołwa we wobłuku Serbskeho blida bě informatiwny wječor, na kotrymž je Rädelowa předwidźany wotběh projekta SROKA předstajiła.