Sprjejcy (JoS/SN). Hižo někotre lěta wutwarja Łužiska a srjedźoněmska towaršnosć hórnistwoweho zarjadnistwa (LMBV) w gmejnje Sprjewiny Doł mjez Bórkhamorom a Sprjejcami Mału Sprjewju. Z tym chcedźa kapacitu wody w rěčce zwyšić a zdobom lěpše zastaranje hłowneje Sprjewje z wodu zaručić, do kotrejež so wona w Sprjejcach wuliwa. Doskónčnje zaruča naprawa konstantne zastaranje Błótow kaž tež metropoloweho regiona Berlin z wodu.
Wot nowembra lěta 2024 do decembra 2025 chce LMBV we wobłuku wutwara rěčnišća starej Sprjejčanskej mostaj nad Sprjewju wottorhać a nowej natwarić. Stary hospodarski móst sewjernje železniskeho mosta brunicoweje železniskeje čary Čorna Pumpa-Hamor bu hižo spotorhany. Přihoty za nowotwar su zahajene. Město stareho mosta ma niski betonowy móst z wjacorymi stołpami nastać. Móst samsneho typusa ma po planach LMBV tež dalši, sto metrow zdaleny stary móst za pěškow južnje brunicoweje železniskeje čary narunać.
