Ćisk (JT/SN). Z 91 čłonami, z toho 62 žonow, je Ćišćanske kulturne towarstwo po sportowym towarstwje druhe najwjetše towarstwo wsy. Wone je takrjec kulturna duša wsy a organizuje kóžde lěto wjacore zjawne zarjadowanja w Ćišćanskim statoku, kiž je domicil towarstwa. Na hłownej zhromadźiznje minjeny pjatk bilancowaše předsydka Tina Schubertowa ­aktiwity zašłeho lěta. Mjez druhim běchu to nalětni swjedźeń a domchowanka kaž tež dźiwadło pod hołym njebjom. Adwentne wiki su wšitke wjesne towarstwa wuhotowali. Dale přewjedźechu rjad Ćišćanske wočinjene wokno kaž tež Serbsku bjesadu a skutkowachu sobu w Krabatowym tydźenju.

Runje tak su na 150 lět starym Ćišćanskim statoku dale twarili, hdźež stajnje dźěło čaka. Tak je Wolfgang Finger z drjewom tepjenu pěc ponowił a René Schubert, Daniel Pollack a Jörg Fichte su za předawanišćo na Ćišćanskim statoku nowu třěchu natwarili. Nimo toho dachu přijězd k statokej wuplestrować.