Přirodoškitarjo pytaja pomoc při natwarje a hladanju płotow
Njeswačidło (SN/MiP). Za krokawy a žaby signalizuja stupace temperatury w nalěću, zo maja swoje zymske kwartěry wopušćić a so na puć k mokrym městnam podać. Tute su za porowanje a jako biotop za dorost idealne. Pjeć stopnjow celsiusa a wyše stupace temperatury w nocy zbudźeja kwasnu naladu mjez nimi. W našich kónčinach pućuja amfibije wot kónca februara hač dosrjedź měrca. Wone pak maja po cyłej Němskej kóžde lěto dale a wjetše ćeže, njewohroženy žiwjenski rum nadeńć.
„Hladajo na ćopłe nalěća w zańdźenych lětach smy lětsa hižo před někotrymi tydźenjemi z postajenjom škitnych płotow za amfibije započinali. Sylneho zmjerzka dla smy proces w minjenymaj tydźenjomaj krótkodobnje přetorhnyć dyrbjeli. Nětko pak z dźěłom pokročujemy“, powěda koordinatorka w Njeswačanskej přirodoškitnej staciji Sophia Hauswald.
