Žony so hižo měsacy na podawki kónc tydźenja w Kulowje přihotuja

Pančicy-Kukow (SN/MWj). Jutře po připołdnju znaja žony z Koslowa, Smjerdźaceje, Noweje Wjeski, Konjec, Sulšec a z njeličomnych druhich wsow jenož jedyn cil: žonjacy póstniski přećah w Kulowje. Potom drje wuhladamy zaso telko kostimow, zo móžeš je lědma hišće někomu přirjadować. Za to su so žony tydźenje a měsacy dołho přihotowali.

Tak bě to tež w Pančicach-Kukowje. Tam wobsteji hižo wot lěta 2001 skupina „Njewěrjomni“ (Die Unglaublichen). Jej přisłuša horstka žonow ze wsy a wokoliny, kotrymž su so mjeztym tež jich dźěći přidružili, powěda Christin Bělkowa. ­Wona je jako frizerka ze swójskim salonom w Kukowje móhłrjec kreatiwna hłowa norskeje skupiny. Tež jeje dźowce ­Sarah a Elisa kaž tež swakowa Christina Schubert, Andreja Horbankowa, Jana ­Pašcyna, jeje dźowka Hana, Katarina ­Žurec a někotre dalše so lětsa na póstniskim ćahu wobdźěla.