Při Gondlowym haće we Wojerecach, njedaloko Łužiskeje kupjele, nastawa městno za grilowanje. Nimo toho připrawja tam nowe nastroje k hrajkanju za dźěći. Tuchwilu wšelke firmy na tym dźěłaja.
Wojerecy (SN/MiR). Spočatk měsaca su trěbne dźěła zahajili, zdźěli rěčnica měšćanskeho zarjadnistwa Corinna Stumpf. W nadawku města je komunalna wuwićowa přirada (KEB) organizatoriske nadawki přewzała. Zarjadowanje grilowanišća a hrajkanskich elementow za dźěći je jedna z wosom wažnych naprawow cyłotneho předewzaća „Zelena wobkroma“ k porjeńšenju města.
KEB běše projekt nazymu 2023 w ramiku swojeje zakónčaceje rozprawy předstajiła. Wojerowska měšćanska rada je jón na swojim wuradźowanju kónc nowembra 2023 wobkrućiła a postupnemu zwoprawdźenju jednotliwych naprawow přihłosowała. Dźěłowa skupina, wobstejaca z čłonow KEB, je ideju za to wuwiła a trěbne prěnje kroki k jeje přesadźenju přihotowała.
