Woblubowany hosćenc na Pastwinej horje słuša ke Kamjencej kaž Lessing abo Kamjenske kołbaski. Wot decembra 2024 ma hosćenc noweju wobhospodarjow. A wonaj staj so hnydom do dźěła dałoj.

Kamjenc (UM/SN). Po posedźenju Kamjenskeje měšćanskeje rady w nowembru 2024 běchu lubowarjo Pastwineje hory wolóženi. Po wobzamknjenju, přepodać hosćenc na Pastwinej horje do rukow bratrow Marca a Marcela Eyke, bě jasne, zo tam gastronomisce dale póńdźe. Nimo toho běchu so radźićeljo za někoho rozsudźili, kiž je z horu a hosćencom zwjazany. „Sym sam na Pastwinej horje bydlił, před 28 lětami spěchowanske towarstwo sobu załožił a w nim dźensa hišće aktiwny. Na te wašnje sym z horu zwjazany“, Marco Eyke powěda.