Z wjelkami Helmec ratarski statok w Jitku dotal žane problemy měł njeje. To je so nětko změniło. Na grawěrowace wašnje dyrbjachu nazhonić, zo tež Krabatowy dwór před wjelkami škitany njeje.
Jitk (UM/SN). Zažne ranje jednoho z poslednich dnjow w februaru 2025 drje Sven a Kornelia Helmec z Jitka ženje njezabudźetaj. „Kołowokoło nas psy šćowkachu. Něšto je so stało. Wokoło štyrjoch dóstachmy informaciju, zo naše wowcy po wsy běhaja.“ Wobhospodarjej Krabatoweho dwora w Rakečanskim wjesnym dźělu chwataštaj, zo byštaj skót zaso na pastwu ćěriłoj. Wodnjo sej Helmecy potom wuwědomichu, što bě so w nocy stało. Wjelki běchu so na pastwu zadobyli, na čož wowcy płót poteptachu a ćeknychu. Pjeć morjenych a šěsć zranjenych wowcow, z kotrychž dyrbjachu někotre tež hišće wumóžić, běchu bilanca nócneho nadpada.
