Udo Witschas w Sakskej statnej kencliji žadanja wokrjesow znazornił

Budyšin (SN). Napjateje financneje situacije Budyskeho wokrjesa dla je so krajny rada Udo Witschas (CDU) hromadźe z předsydomaj frakcijow Budyskeho wo­krjesneho sejmika minjeny pjatk ze sakskim ministerskim prezidentom Michaelom Kretschmerom (CDU) a financnym ministrom kraja Christianom Piwarzom (CDU) w Sakskej statnej kencliji zešoł. ­Zaměr rozmołwy bě, konstruktiwne a do přichoda kmane rozrisanje za financne wuhotowanje sakskich wokrjesow na­makać.

„Smy znowa swoju dramatisku financnu situaciju znazornili a swoje žadanja na sakske knježerstwo potwjerdźili“, podšmórny krajny rada zawčerawšim w nowinarskej zdźělence. Mjez druhim žadaše sej přidatne financielne srědki za přichodnej lěće, naslědne přiměrjenje sakskeho financneho wurunanja wot lěta 2027 jako dołhodobny stabilny financny zakład za wokrjesy, kaž tež wjetšu financnu podpěru hladajo na winowatosće wo­krjesow w socialnym wobłuku, kotrež ­wone w nadawku Zwjazka a kraja pře­wozmu.