Budyska hudźbna šula z koncertom na zasłužbnu wučerku spominała

Budyšin (CRM/SN). Loni we wysokej starobje 94 lět zemrěła je dr. Magdalene Kemlein. Na polu hudźbneho kubłanja w Budyšinje bě wona jara připóznata wosobina, kotraž zawostaji směrodajne slědy. Minjenu sobotu zarjadowa k jeje čestnemu wopomnjeću Wokrjesna hudźbna šula portretowy koncert w awli Schilleroweho gymnazija. Połni dźaka a z wjele radostnymi dopomnjenkami su generacije něhdyšich hudźbnych šulerjow a šulerkow kaž tež dalši hosćo přeprošenje na wopomnjenski koncert za hudźbnu pedagogowku, ­chórowu dirigentku a komponistku dr. Magdalene Kemlein sćěhowali.

Wona je wot lěta 1958 hač do lěta 1997 w hudźbnej šuli předewšěm hraće na klawěrje a hudźbnu teoriju wuwučowała kaž tež chóry nawjedowała. W lěće 1967 załožeše wona legendarny Holči komorny chór. Zahoriće spěwachu w nim tež serbske šulerki. Jako zastupowaca direktorka šule pěstowaše wona dobre kolegialne přećelstwo z direktorom Jurjom Winarjom.